Como todos sabemos, cada 17 de maio Galicia honra as súas Letras e a súa Lingua. Foi no ano 1963 cando se decidiu homenaxear a aquelas persoas que destacaron pola súa creación literaria en galego ou pola defensa da nosa lingua. A celebración do evento foi proposta por algúns membros da Real Academia Galega que con motivo da conmemoración do centenario de Cantares Gallegos de Rosalía de Castro (obra que marca o inicio do Rexurdimento) consideraron que a Academia debería consagrar o simbolismo da data nunha celebración anual. Propúxose o día 17 de maio, ó ignorarse a data da publicación do libro, por ser nese día cando Rosalía de Castro llo adicou a Fernán Caballero, sendo a propia Rosalía a primeira homenaxeada.
Ao longo destes 50 anos de celebracións, son moitos os autores e as autoras aos que se lles ten adicado o Día das Letras Galegas. Así por exemplo, os celanoveses Manuel Curros Enríquez e Celso Emilio Ferreiro foron homenaxeados en 1967 e 1989 respectivamente.
Este ano, a figura central das Letras Galegas será Roberto Vidal Bolaño (Santiago de Compostela 1950-2002), un recoñecido actor e escritor de numerosas pezas de teatro en galego. A súa produción está caracterizada polo compromiso co país e a lingua, a experimentación estética e o diálogo coa tradición. A figura e a obra de Roberto Vidal Bolaño foron fundamentais na construción dun teatro nacional galego.
Comentarios
Publicar un comentario