A lectura atopou unha nova forma de viaxar polos corredores do centro. Desde hai unhas semanas, o alumnado pode descubrir unha iniciativa tan orixinal como ilusionante: a Biblioteca Móbil, un estante sobre rodas repleto de libros (actualmente de libros de agasallo para que leven a casa sen ter que devolvelos) pero máis adiante percorrerá os corredores e os patios ofrecendo lecturas para todos os gustos…!
Este proxecto, impulsado polo
novo equipo de Biblioteca, nace cun propósito claro: achegar os libros ao
alumnado e fomentar o pracer da lectura sen obrigacións.
Os exemplares, serán seleccionados
con mimo, procedentes do noso amplo catálogo da biblioteca, así como doazóns e
adquisicións pensadas para cada idade e nivel lector. A idea é sinxela pero
poderosa: cada estudante poderá elixir un libro, levalo durante o tempo de
recreo e devolvelo antes de subir de novo a súa aula.
A Biblioteca Móbil intégrase
dentro do actualizado Plan de Biblioteca e do Proxecto Lector, de Escritura e
de Acceso á información (PLEA), que busca renovar a forma en que o centro vive
a lectura. Este plan aposta por un modelo de biblioteca dinámica, aberta e
participativa, onde os libros non se limitan aos andeis, senón que saen ao
encontro do alumnado. Queremos que cada libro atope ao seu lector e que cada
lector descubra o pracer de ter un libro propio.
Os títulos irán desde clásicos xuvenís ata novidades contemporáneas, pasando por cómics, poesía e álbums ilustrados. En definitiva, a Biblioteca Móbil non só repartirá libros: repartirá ilusión, curiosidade e ganas de aprender. Unha iniciativa que demostra que a lectura, cando se vive en liberdade, pode ser o mellor regalo que unha escola ofrece á súa comunidade.
Comentarios
Publicar un comentario